Isumat.com/7:30AM, August 29, 2020
Waray la gihapon senyales nga mahugpoy na an pakadarahig han Covid-19 ha Sinirangan Bisayas katapos la nga mahipatik an 127 nga bag-o nga kaso han kagaw dida han report kakulop (Agosto 28) han DOH Regional Office.
Dida hini nga mga bag-o nga kaso, 28 an tikang ha Tacloban City. Nagpapamatood ini nga padayon an Local Transmission dida han syudad tungod kay umabot na ha 318 an nagkatatapnan ngan sobra 200 an Active Cases hapagkayana.
An Catbalogan City in mayda na 395 nga mga kaso ug an nahidugang kakulop in 25 nga natapnan. Mayda 350 nga Active Cases yana didto hini nga syudad ngan haros ngatanan natapnan pinaagi han Community Transmission. Nagpapabilin nga aada ha Enhanced Community Quarantine an Catbalogan tungod hini nga sitwasyon.
Ha Calbayog City-3, Zumarraga-7, Pinabacdao-6, Hinabangan-2, Villareal-4, San Sebastian-3, Basey-2 ngan Sta Rita-1. Ini nga mga kaso in ngatanan close contacts han mga kumpirmado nga nagkatatapnan.
Didto naman ha Northern Samar, 13 an natapnan ha Catarman ngan 1 ha San Isidro. Dida hini, 13 an close contacts ngan 1 an Health Worker.
Siyam naman nga Locally Stranded Individuals an mga bag-o nga pasyente ha Libagon, Malitbog, Pintuyan, San Juan, San Francisco ngan Sogod ha Southern Leyte.
Mayda napulo nga natapnan ha Palo. Ginkokomponer ini hin upat nga close contacts ngan unom nga LSI. Samtang mga LSI gihapon an nagpositibo ha Villaba-4, Burauen-2, ngan Barugo-2.
Close Contact an tag-usa nga natapnan ha San Miguel ngan Alangalang. Waray pa maghatag hin impormasyon an LGU-Tunga ngan LGU-Mahaplag kasumpay han ira bag-o nga Covid Patients.
An mga nagpaka-recover ha Eastern Visayas in umabot na 1580. Hapagkayana, mayda 1129 nga Active Cases an rehiyon ngan 19 na an namatay. An nagkatatapnan nga Health Personnel in aada na 285.
An bug-os nga rehiyon an iginbalik ha General Community Quaratine tikang ha Modified GCQ epektibo Agosto 28 tobtob Setyembre 11, 2020. #
