Isumat.com/9:48AM, June 4, 2020
Mahugot nga imbestigasyon an gindudumara yana han Baybay City Police Office mahitungod han kamatay hin usa nga estudyante han Visayas State University (VSU).
Sumala han report nga nahikay han Isumat.com, nalutaw ha inisyal nga imbestigasyon nga nagpakamatay an biktima nga ginkilala nga hi Jeanji Oquias, 28 anyos nga lalaki. Hiya in 3rd year agriculture student ha VSU-Main Campus, Baybay City. Waray pa liwat impormasyon kun ano an hinungdan nga nag-suicide an biktima.
Antis madiskubrehan an patay nga lawas han biktima kagab-i, an iya pamilya in nagreport nga nawawara hi Oquias. Paghagos hin pira ka oras nga pagpinanmiling, an iya patay nga lawas in nakit-an ha usa nga tay-aw nga parte han Brgy Gabas.
Kasumpay hini, an liderato han unibersidad in nagseguro han ira pagbulig ngadto han pamilya ni Oquias. An mga tinaglawas han VSU in nakatalaan makigkita han pamilya yana nga adlaw.
An Supreme Student Council han VSU in maghihimo gihapon hin mga pamaagi basi makahatag hin ayuda financial ha pamilya ni Oquias.
An mga nagin kaklase, kasangkayan ngan kakilala han biktima in duro an kabido hini nga panhitabo labi na gud nga waray hira makakita hin senyales o panigamnan nga mabubuhat ini han estudyante. # (KEVIN SIOSANA with report from Amaranth-VSU)
