Isumat.com/Hulyo 7, 2022
Magigin madulom an kabubwason hin usa nga estudyante katapos la nga ma-aresto hiya ha illegal drugs buy-bust operation ha Brgy Liberty, Hilongos, Leyte hadin Hulyo 4, 2022.
An suspetsado in ginkilala nga hi John Angelo Baldazo, 19 anyos, estudyante, ngan residente han Brgy Western han nasabi nga bungto.
Arestado gihapon an kaupod ni Baldazo nga hi Jarold Notarte, 21 anyos, nag-uukoy ha Brgy Talisay, Hilongos.
An mga otoridad in nakapalit hin tulo ka sachet hin gintotoohan nga shabu tikang han mga suspetsado ngan nakarekupo hin kadugangan nga walo ka sachet durante han body search.
Dida han report han PNP-Regional Office, balor hin 554 Mil pesos an droga nga may kabug-aton nga 80 gramos.
Nakuha gihapon han mga otoridad an 100 Mil pesos nga buy-bust money, 1 sachet hin gintotoohan nga marijuana, weighing scale, cellphone ngan motorsiklo nga waray plate number.
Mga kaso tungod han pagtalapas han Dangerous Drugs Act an aatubangon han mga suspetsado ha hukmanan. #
