Isumat.com/7:38AM, November 14, 2020
Waray kamatuoran an mga impormasyon nga nagkagawas ha social media nga nagkamay-ada hin agway ha butnga han Philippine Army ngan mga rebelde nga NPA ha Borongan City, Eastern Samar.
Dida han radio program han Philippine Information Agency-Eastern Samar, mahugot nga pinanhimuwa ni Major Rommel Cesista han Eastern Samar PNP Community Affairs Unit ini nga panhitabo. Nagsering hi Cesista, dako nga buwa ini kay waray natabo nga engkwentro han nag-agi nga pira ka adlaw.
Han magsarang an impormasyon, kadagmitan pumakadto ha tay-aw nga mga barangay han syudad an Intelligence Unit han PNP-Eastern Samar basi makumpirmar kun tinood an notisya. Nagsering an opisyal nga dida han panginano han mga otoridad, waray kamatuoran an mga sumat-sumat.
Igindig-on gihapon ni Cesista nga peke an nagsarang ha facebool nga video kun diin mayda samaran ngan nag-iikamaratay nga sundalo.
An probinsya han Sinirangan Samar in nagpapabilin nga waray kasamok ngan waray tarhog ha seguridad hapagkayana, pahayag pa han PNP Official. #
