Isumat.com/8:49AM, November 4, 2020
Naawat an kinabuhi hin usa nga empleyado han Department of Environment and Natural Resources ha usa nga aksidente ha kadalanan ha Brgy Malaintos, Dolores, Eastern Samar, kakulop, Nobyembre 3, 2020.
Ginkilala an biktima nga hi Rolando Deloria, 48-anyos, may asawa, taga Basey, Samar. Hiya in naka-destino ha DENR-Dolores nga namumutang ha Brgy 10 han mao nga bungto.
Subay han nahikay nga report han Isumat.com, hi Deloria in nagmamaneho hin motorsiklo ha National Highway ha Brgy Malaintos, kakulop han kulop, han bunggo-on hiya han iginkakatapo nga traysikol nga ginmamaneho-an ni Arnel Operario, may-asawa, ada ha igo nga pangidaron ngan residente ha Brgy 12.
Dida han imbestigasyon, an traysikol ni Operario in kumabat ha linya han kalsada ni Deloria hinungdan nga nagsampakay an ira mga behikulo. Tungod han pwersa han banggaay, nahilabog hi Deloria ngan na-untog an iya ulo ha kalsada.
Hi Operario in kumalagiw dayon katapos han disgrasya, samtang hi Deloria in gindara ha Casano Hospital ha Dolores. Nanalinguha an personales han hospital nga masalbar an biktima pero naawat an iya kinabuhi.
Naka-andam na unta an ambulansya nga magdadara kan Deloria ha Tacloban City basi didto pagtambalon, pero nautdan na hiya han kinabuhi samtang gin-aandam an biyahe tikadto ha Tacloban. #
