Isumat.com/8:40AM, July 7, 2020
Gintikangan na han DSWD an pag-distribuer han Emergency Subsidy ngadto han mga “waitlisted” nga waray makatagamtam han syahan nga arangkada han Social Amelioration Program (SAP) cash assistance.
Nagpahayag an DSWD nga an ira mga empleyado in nagtikang panhatag han tag 5 mil nga subsidiya ha mga bungto han La Paz, Leyte; Caibiran, Biliran; ngan Lawaan, Eastern Samar. 214 nga mga beneficiario tikang han nasabi nga mga lugar an nakakarawat kun diin nakagpagawas an DSWD hin 1, 070, 000 pesos.
Ha ilarum han Executive Order 112, deri na upod an Eastern Visayas han ikaduha nga panhatag han SAP tungod kay deri na iginpapasunod an Enhanced Community Quarantine han rehiyon. Tungod hini, an mga taga Region 8 in naka-agom la han syahan nga hugna ngan waray na ikaduha.
Pero kadam-an nga kwalipikado nga pamilya han SAP an waray maka-agom han 1st Tranche, salit iginmando han gobyerno an panlista han”waitlisted” nga asya an tatagan han Emergency Subsidy.
Nagsering hi DSWD Regional Director Marie Angela Gopalan nga mayda na nira eskudyul han iba nga munisipalidad ngan ira susuratan an mga Mayors basi makag-andam an mga beneficiario.
An SAP ug Emergency Subsidy in ayuda pinansyal tikang han gobyerno ngadto han kablas nga pamilya sugad man han nagkawawarayan trabaho durot han pandemya han COVID-19. #
