Isumat.com/8:03AM, May 16, 2020
Tinikangan yana nga adlaw, Mayo 16, igpapasunod na an Modified General Community Quaratine (MGCQ) ha bug-os nga Eastern Visayas, pero magpapabilin nga aada ha ilarum han Enhanced Community Quarantine (ECQ) an bungto han Tarangnan, Samar.
Ini in mahitungod nga gin-aprubaran han Regional Inter-Agency Task Force on Covid-19 an hangyo ni Samar Governor Michael Tan nga pahilawigon pa tobtob Mayo 31 an ECQ dida han nasabi nga munisipalidad.
Lima gihapon nga barangay han bungto an padayon nga nag-implementar han total lockdown.
Nagpapadayon man gud tobtob yana an community transmission han makamaratay nga kagaw dida han lugar tobtob yana. Kakulop, iginreport han DOH-Region 8 nga mayda lima ka tawo an bag-o nga nagpositibo han virus ug tanan hira taga Tarangnan. Hinungdan hini, 20 na nga Tarangnanon an natapnan han kagaw.
Ha bug-os nga rehiyon, 25 na an nag positibo. An lima nga iba in tikang ha Catarman, Calbayog, Catbalogan ngan duha nga taga Burauen.
Dida han bag-o nga lima nga pasyente, upat ha ira an ig-aakomodar ha Community Isolation Unit ha ira bungto, samtang an usa nga sobra 60 anyos an edad igbabalhin naman ha Samar Provincial Hospital. Hira ngatanan in aada ha maupay nga kahimtang an panlawas, sumala han DOH.
Nagpapabilin gihapon nga waray binawi-an hin kinabuhi han mga natapnan denhi ha Eastern Visayas ngan walo na an naka-recover nga mga pasyente, samtang an iba in gintatambal ha magkalainlain nga hospital.
Tobtob kakulop nga adlaw, an Eastern Visayas in mayda 1,340 nga Suspected Cases kun diin an 63 in naka-admit ha hospital ngan aada ha Home Isolation an 1,277.
An lockdown han duha nga barangay ha Burauen, Leyte in waray pa bubulkasa tobtob yana ngan padayon gihapon an ECQ didto hini nga bungto. An duha nga COVID patients tikang ha ira in natambal na han sakit ngan tanan han ira close contacts in negatibo an testing ha corona virus.# (KEVIN SIOSANA)
