Isumat.com/Pebrero 11, 2022
Segurado nga makakabulig ha panginabuhi ha mga nagbabaligya hin shellfish o pangti-on an pasamwak han Bureau of Fisheries and Aquatic Resources (BFAR) Regional Office nga talwas ha red tide poison an ngatanan nga kadagatan ha bug-os nga rehiyon.
Hi BFAR Regional Director Juan Albaladejo in nag-anunsyo nga subay han monitoring han ira mga personales, waray na kadagatan ha Rehiyon Otso nga apektado yana han red tide.
Hinungdan hini, gin-aghat ni Albaladejo an publiko nga puede manguha, magbaligya, pumalit ngan kumaon han ngatanan nga klase hin shellfish nga makukuha ha aton kadagatan.
Dida han report han Philippine Information Agency-8, iginpatapod han BFAR nga bisan kun waray red tide hapagkayana, magpapabilin an hingpit nga surveillance o pagbantay han ira mga personales ha mga kadagatan basi kadagmitan masabutan kun mayda na liwat bumutho nga sugad hini nga problema ha maabot nga mga panahon.
An BFAR in nagkokolekta hin mga samples tikang ha kadagatan han rehiyon ngan iginpapa-ilarum ini hin testing ha laboratoryo duha o tulo ka beses kada semana, pahayag pa han ahensya. #
