Isumat.com/9:07AM, May 8, 2020
Padayon nga naghihinitaas an ihap han mga tawo ha Rehiyon Otso nga ginkokonsiderar han Department of Health nga COVID-19 Suspected Cases.
Dida han gibabag-uhi nga record han DOH-Region 8 nga iginpagawas kakulop (Mayo 7) umabot na ha 759 ini nga suspected cases. Nadugangan ini nga ihap hin 50 ka tawo kun igtatanding han record han Mayo 6.
Dida hini nga 759, 66 in naka-confine ha magkalainlain nga hospital han rehiyon, samtang 693 naman an aada ha Home Isolation. An mga naka-admit ha hospital amo ini: 21 ha Leyte, 19 ha Southern Leyte, 8 ha Samar, 7 ha Tacloban, 5 ha Ormoc, ngan tag duha ha Eastern Samar, Northern Samar ngan Biliran.
Nagpapabilin naman nga 14 ka tawo an nag positibo han corona virus ha rehiyon kun diin lima ha ira an nakagawas na ha hospital.
Hapagkayana, mayda sobra 500 nga swab samples nga iginpadara ha Cebu para han confirmatory testing an ginpapamulat an resulta.
Subay ha DOH guidelines, puede makonsiderar nga Suspected Case amo an masunod: Tawo nga may Severe Acute Respiratory Illness ngan mayda temperatura nga 38 degree Celsius o sobra pa, may ubo o sore throat, nagkukuri an pag ginhawa ngan posible may penumonia.
Lakip gihapon an may sintomas hin influenza ngan nagbyahe ngadto hin lugar nga may local transmission han kagaw . Upod gihapon an mga tawo nga may sintomas hin influenza ngan iginka-urusa hin kumpirmado o probable case.
Puede gihapon magin suspected case in usa nga tawo nga may hiranat o ubo o pagkuri han pag ginhawa labi na kun 60 anyos na o sobra pa an edad ngan mayda iba nga sakit sugad hin hypertension, lung problem ngan diabetes. #
