Isumat.com/3:15PM, May 5, 2020
Makakatagamtam gihapon hin ayuda pinansyal an mga kwalipikado nga pamilya nga waray makakarawat han tag singko mil nga cash assistance han Social Amelioration Program (SAP).
Hi Gobernador Ben Evardone an nagpasamwak nga tag dos mil pesos an ma-aagoman hini nga mga pamilya nga waray mahilakip han SAP, TUPAD, 4Ps, ngan SURE Aid Program. Iginpabati ini ni Evardone dida han meeting kakulop han Provincial Inter-Agency Task Force on COVID-19.
Gintagan hin duon han gobernador nga ini nga ayuda in lain la han tikang ha DSWD ug ini in dara han panlimbasog han gobyerno probinsyal. Kasumpay hini, ginmanduan ni Evardone an mga alkalde han mga bungto nga kadagmitan igsubmiter ha kapitolyo an mga ngaran nga angay tagan han tag dos mil pesos.
An mga Barangay Tanod ngan Nutrition Scholars in matatagan gihapon hini nga hinabang tikang han Provincial Government.
Samtang, an LGU-Sulat in manhahatag hin tag-usa ka sako nga bugas ngadto han mga pamilya nga waray makakarawat han SAP cash assistance.
Labot la hini, magdudumara gihapon hin libre nga pag-arot an LGU para ngadto han mga kalagsan ngan mga PWDs ha ira bungto nga waray makakagawas ha ira balay dara han kwarentina. Mismo an mga “Tita” han Sulat an magbabalay-balay para han libre nga arot. #
