Isumat.com/7:20AM,July 6, 2020
Namatay in usa nga suspetsado pagbaligya hin iligal nga droga han umato hiya kontra han mga otoridad dida han buy-bust operation ha Brgy Cavite West, Palo, Leyte.
An suspetsado in ginkilala nga hi Frederick Nabora, alyas Erik ngan ginkokonsiderar nga High Value Target. Dida han report han Palo Municipal Police Office, usa nga pulis an nakapalit hin usa ka sachet hin gin-aalegar nga shabu kan Nabora ngan han iya pag-signal ha iya mga kaupdanan nga arestuhon na an suspetsado, bumunlot hi Nabora hin pusil, pero naunahan hiya han mga otoridad pagpabuto.
Naigo ha magkalainlain nga parte han lawas an suspetsado ngan igindeklarar nga dead on arrival han dad-on hiya ha Leyte Provincial Hospital.
Samtang ha iba naman nga notisya, usa nga patay nga lawas an natad-an han mga mangirisda ha Carigara, Leyte. Dida han inisyal nga imbestigasyon, ginkilala an biktima nga hi Toto Petallana, 60 anyos ngan nag-uukoy ha Brgy Baruguhay Central, Carigara.
Hinsabutan nga hi Petallana in nasipatan nga nagbabaktas ha baybayon pira ka oras antis an panhitabo. Gintotoohan nga kumarigos hiya ha dagat pero ginkumbulsyon kay mayda niya gin-aantos nga sakit.
Gindara an patay nga lawas ha Rural Health Unit basi igpailarum ha Post Mortem Examinaton. #
