Isumat.com/Hulyo 26, 2022
Upat ka tawo an nasikop han mga otoridad dida han ginhimo nga anti-illegal drugs operation hadton Hulyo 22, 2022 ha Brgy 1, Taft, Eastern Samar.
Dida han operasyon pasado alas 11 han gab-i, an mga operatiba han PDEA-Eastern Samar, PNP Provincial Office, Taft Municipal PNP Station ngan 81st Company han Philippine Army an nakapukan han drug den kun diin nakumpiskar an iligal nga droga ngan nagka-aaresto an mga suspetsado.
Ginkilala an mga gintatahapan nga hira Roberto Achay ngan Vicente Achay, nga amo an gin-aalegar nga nagdudumara han drug den; ug an ira mga bisita nga hira Pacita Simballa ngan Wenifredo Labos.
Subay han Chemistry Report han PDEA, an shabu nga narekupo in may timbang nga 16.66 gramos ngan may balor nga 113, 329 pesos. Lakip gihapon han nakumspikar han mga otoridad in magkalainlain nga drug paraphernalia.
An mga suspetsado in temporaryo nga igindetiner ha Taft PNP Station ngan hira in maatubang han mga kaso kasumpay han ira pakasupak han mga probisyon han Comprehensive Dangerous Drugs Act. #
