Isumat.com/7:46AM November 4, 2020
Sobra hin 100 Mil pesos kantidad hin iligal nga droga ngan walo ka tawo an na-aresto ha magkalain nga operasyon han mga otoridad kasumpay han kampanya kontra droga.
Didto ha Macrohon, Southern Leyte, an mga elemento han PDEA Regional Office ngan Southern Leyte Police in nakarekupo hin iligal nga droga balor hin 128 Mil Pesos han ira pagrondahon an gintotoohan nga drug den ha Brgy Ilihan.
An mga otoridad in naghimo anay hin buy-bust ngan pakakumpirmar nga mayda gud man operasyon han droga, ira na ginbuhat an raid kun diin nakakuha hin 20 gramos hin gin-aalegar nga shabu.
An mga nagkadadakop nga suspetsado amo an masunod : Francisco Kuizon (Drug den maintener); ug an mga nabisita han lugar nga hira Ricky Gonzales, Anthony Abrigo, Lester Cano, Zaldy Matondol, Solferino Demetrio ngan Nelson Simblante.
Ha lain naman nga panhitabo, nakwelyuhan han kapulisan han Jaro, Leyte Station hi Faisal Dirampatan ha buy-bust operation didto ha Brgy Macanip, Nobyembre 3, 2020.
An suspetsado in usa anay nga security guard, inasaw-an, ngan residente ha Poblacion District III, Jaro. Nakuha tikang ha iya in siyam nga mga plastic sachet nga may sulod hin gintatahapan nga shabu ug an kwarta nga gingamit dida han transaksyon.
Nagpahayag an mga otoridad, ira ginhimo an operasyon kontra kan Dirampatan han pagngaranan hiya han iya anay kaupdanan ha iligal nga aktibidad nga nadakop pira na ka semana an nakalabay.
An mga suspetsado in nakapaslak yana ha karsel ha Macrohon ngan Jaro ngan mag-aatubang han mga kaso nga igsasalawad kontra ha ira. #
