Isumat.com/Hulyo 15, 2022
Pito nga mga drug personalities an na-aresto han mga otoridad ngan napukan an drug den dida han ginbuhat nga operasyon ha Leyte, Leyte hadton Hulyo 13, 2022 .
An mga personales han PDEA Region 8, Leyte Provincial PNP Office, Philippine Army 93rd Infantry Battalion ngan Leyte Municipal Police Office an nagburublig dida han buy-bust operation alas 4 han kulop hadto nga adlaw ha Brgy Salug.
Nakumpiskar han mga tinubyanan han balaud in tulo ka sachet hin gin-aalegar nga shabu may timbang nga 12.13 grams ngan nagkakantidad hin 82 Mil pesos.
An mga suspetsado nga nagkadadakop amo hira Alfredo Lauron Jr nga amo an gintutudlok nga nagmementinar han drug den; ug an mga bisita didto han mao nga lugar nga hira Jerry Lauron, Jason Lauron, Alfredo Lauron Sr, Mauricio Canete, Ramil Rumol ngan Jaymark Gripo.
An mga suspetsado in temporaryo nakapaslak ha PDEA Detention Facility samtang gin-aandam an kaangayan nga mga kaso nga igsasalawad kontra ha ira. #
