Isumat.com/7:19AM, December 7, 2020
Maatubang hin mga kaso in usa nga empleyado han gobyerno ngan usa liwat nga konsehal hin barangay nga nagkasisikmit ha magkalain nga operasyon han mga otoridad ha Tacloban City ngan Eastern Samar.
Kakulop, Disyembre 6, an suspetsado nga hi Kinneth Mark Nite, 26-anyos nga nagtatrabaho ha gobyerno in nadakop han mga operatiba han PDEA-Region 8 ha Peerless Village, Bagacay, Tacloban. Sumala han mga otoridad, hi Nite in usa nga High Value Target.
Nakapalit an mga tinubyanan han balaud tikang han suspetsado hin gin-aalegar shabu may kabug-aton nga 11 gramos kantidad hin 81 Mil Pesos. Labot la han shabu, narekupo gihapon tikang ha iya in duha ka sachet hin marijuana.
Kakulop gihapon han pasado ala 1 han kulop, an mga kapulisan nga kaapi han Anti-Drug Unit han Tacloban in naka-aresto kan Mervin Buena, 30 anyos ngan residente ha Brgy 93, Bagacay.
Nakumpiskar tikang han suspetsado an 40 Mil pesos nga balor hin shabu, buy-bust money, ngan cellphone.
Samtang, hi kagawad Rizaldo Lobina han Brgy Mantang, Taft, Eastern Samar in arestado han PDEA. Usa liwat hiya nga ginkokonsiderar nga High Value Target.
An mga PDEA Agents in nakapalit tikang kan Lobina hin duha ka sachet hin gintotoohan nga shabu. #
