Ginhuhulat pa han Department of Health-Region 8 an resulta han laboratory test kasumpay han lalaki nga Person Under Investigation nga namatay hadton Abril 1, 2020. Dara hini, igindig-on han ahensya nga waray pa tawo nga namatay denhi ha Eastern Visayas nga COVID-19 an hinungdan.
Dida hin usa nga official statement iginpagawas han buhatan kagab-i (April 5, 2020), ginklaro han DOH nga tobtob yana waray pa umabot an resulta han testing han samples han 51-anyos nga PUI. An ahensya an naghatag hini nga kasayuran tungod han nagpapadayon nga pagsarang hin mga hurobhurob nga COVID-19 an rason han kamatay han pasyente. An patay nga lawas han nasabi nga PUI in iginlubong dida han Abril 2.
Dida han Abril 3, an sample hini nga PUI an iginpadara ngadto ha Vicente Sotto Memorial Hospital and Medical Center ha Cebu ngan tobtob kakulop waray pa umabot an resulta.
Nagsering pa an DOH nga dida han Abril 2, an Eastern Visayas Regional Medical Center, nga amo an referral hospital, an nagpagawas hini nga final diagnosis: Acute Respiratory Failure from Community Acquired Pneumonia-High Risk with Hypoxia; Pulmonary Tuberculosis with clinical diagnosis of Covid-19 SUSPECT; Diabetic Ketoacidosis.
Nag-esplikar gihapon an DOH nga ira ginhihimo ngatanan an pitad basi maseguro gud nga insakto an ira iginpapagawas nga mga impormasyon kasumpay han kabutangan han mga PUI ngan PUMs.
Hapagkayana, nagpapabilin nga duha ka tawo an nagpositibo han corona virus ha Rehiyon Otso. An usa hini in naka-recover na ngan nakagawas na ha hospital, samtang an ikaduha in padayon pa nga gintatambal.
Nanawagan gihapon an DOH ha publiko nga igpadayon an malimpyo nga panlawas, deri mag ginawas gawas ha balay, ngan deri tomood dayon hin mga hurobhurob ngan deri magpinasarang hin waray kasayuran nga mga impormasyon. #
(Posted 5:13 AM, April 6, 2020)
