Waray kamatuoran an mga impormasyon nga nadugangan na liwat an mga tawo nga nag-positibo han corona virus nga tikang daw ha Javier ngan Tabontabon ug iba pa nga bungto han Leyte.
Subay han iginpagawas nga advisory han DOH-Region 8 yana nga kulop (Abril 18, 2020), nagpapabilin nga lima ka tawo an kumpirmado nga natapnan han COVID-19 ha Eastern Visayas.
Waray gihapon bag-o nga resulta hin confirmatory testing tikang ha Vicente Sotto Memorial Medical Center ha Cebu kay an katapusan nga batch han swab samples nga nakolekta tobtob han Abril 16 in waray pa mahipadara ngadto ha Cebu kay waray abilable nga flight hin eroplano han Philippine Air Force.
Ginklaro pa han DOH nga an aktuwal nga COVID patient tikang ha Region 8 in lima la ka tawo tobtob yana. Gumawas man gud ha DOH-COVID National Tracker ha internet nga pito ka tawo an tikang ha Eastern Visayas. An duha hini in sobra na usa ka tuig nga nag-uukoy ha Metro Manila ngan waray na uuli nganhi, pero han magkasakit hira didto ha Manila, an ira iginsumat nga address in Region 8, sanglit nahipatik nga tikang denhi hira. Sanglit, sumala han DOH, lima gud la ka tawo tikang ha Sinirangan Visayas an nag positibo han virus tobtob yana.
Amo ini hira an taga Catarman ngan Calbayog nga naka-recover na ngan nakagawas na ha hospital; an duha nga tikang ha Tarangnan, Samar nga padayon nagpapatambal; ug an bag-o nga pasyente tikang ha Burauen, Leyte.
Ginsasagdunan naman han ahensya an mga tawo nga kun atat na atat pagpasarang hin deri beripikado ngan deri segurado nga impormasyon, manhunaw na la lugod han ira kamot.
Pira pa la ka oras an nakalabay, an RHU-Javier, Leyte in nagpasamwak gihapon nga buwa la an mga sumat-sumat nga may COVID positive ha ira munisipalidad. #
(Posted 6:43 PM, April 18, 2020)
