Isumat.com/7:32PM, May 11, 2020
Beinte na ka tawo ha Sinirangan Bisayas an natapnan han corona virus. An DOH-Region 8 in nagpasabot yana nga gab-i (Mayo 11) nga mayda usa ka tawo an bag-o nga nag positibo han virus, sanglit tikang han 19 nga nagpositibo nagin 20 na ini katawo.
An gibabag-uhi nga nag positibo amo in taga Tarangnan, Samar. Hiya in babaye ngan 29 anyos an edad. Hiya in nagin close contact nira Patient#13 ngan Patient#18 nga igkasi niya taga Tarangnan. An iya swab sample in ginkuha hadton Abril 29 ngan yana pala umabot an resulta.
89 nga resulta hin samples an nakarawat han DOH yana nga gab-i, kun diin 88 an negatibo ngan usa an positibo. Iginkakalipay gihapon pagsumat han DOH nga pira nga mga police officers ha Tarangnan in negatibo an resulta. Negatibo gihapon an samples han mga Mayors ngan health personnel nga iginka-urusa hin meeting han nag positibo nga taga Catbalogan City.
Dida han 88 nga negatibo, 66 in tikang ha probinsya han Samar, walo an tikang ha Leyte, unom tikang ha Tacloban, lima ha Southern Leyte ngan tulo ha Biliran.
Hapagkayana, 20 na katawo an kumpirmado nga natapnan han COVID-19 ha Region 8.
Mayda pa 106 nga swab samples an ginpapamulat an resulta tikang han Confirmatory Test ha Cebu City.
Ginmomonitor naman han DOH in 1,031 nga Suspected Cases ha bug-os nga rehiyon. # (KEVIN SIOSANA)
