Isumat.com/4:07AM,JUly 21, 2020
Bisan kun nadugangan hin duha nga bag-o nga pasyente han COVID-19 an Eastern Visayas, nagpapabilin nga hitaas an recovery rate nga aada ha 95% hapagkayana.
Dida han 675 nga Positive Cases, 642 na an naka-recover sumala han gibabag-uhi nga report han DOH Regional Office.
An duha nga bag-o nga kaso in mga Locally Stranded Individuals. An Hinunangan, Southern Leyte in may bag-o nga natapnan ug hiya in 19 anyos nga babaye tikang ha Manila; samtang tikang naman ha Cebu an 39 anyos nga lalaki nga bag-o nga pasyente ha Calubian , Leyte.
Kadungan han pirmi pagpahinumdom han DOH han mga pitad basi deri matapnan han corona virus, ira gihapon ginpapahinumdom an publiko nga maghirot kontra han dengue. Nagsering an ahensya nga mayda na 4,221 nga kaso hin dengue ha rehiyon tikang Enero tobtob Hulyo 18, 2020. Siyam na katawo an namatay dara hini nga sakit tikang han lamok.
Ini nga iihap in haruhabubo hin 52% han mga dengue cases han parehas nga panahon hadton 2019, pero deri bootsidngon nga magpapasibaya la an katawhan, pahayag pa han DOH.
An mga nadarahigan han dengue in tikang ha walo ka bulan tobtob ha 90 anyos nga mga pangedaron.
An siyam nga binawi-an hin kinabuhi in tikang ha Abuyog, La Paz, Ormoc, Baybay, Tacloban ha Leyte; Giporlos, Arteche ngan General MacArthur ha Eastern Samar; ngan Tagapul-an, Samar.
An probinsya han Leyte an may gidadamu-i nga kaso hin dengue (2160), 279 naman an tikang ha Tacloban; 228 ha Baybay; ngan 158 ha Ormoc.
An Southern Leyte in mayda 571 nga kaso, samtang an Samar in 521 an nagkasakit han dengue. An Biliran in mayda 416, Eastern Samar 238, ngan 270 naman ha Northern Samar.
Gin-aaghat han DOH nga pirmi maglimpyo han kalibungan ngan gub-on an mga lugar nga posible ginpupugaran han dengue ngan kun may gin-aabat nga sintomas han sakit, kadagmitan nga magpakunsulta ha mga otoridad han panlawas. #
