Nagpapabilin la gihapon nga waray kaso han COVID-19 an Sinirangan Visayas. Ini in sumala han Department of Health Regional Office.
Ha usa nga interview kan John Paul Roca, tagpamulong han DOH-8, tobtob kanina han alas 10 han aga, Marso 11, waray kaso hin nag positibo han COVID-19 ha aton rehiyon. Iya pa iginsumat nga waray gihapon PUI o Person Under Investigation.
Igindugang pa ni Roca nga an mayda la denhi ha aton amo in dose ka tawo nga PUM o Persons Under Monitoring kay tikang ini hira hin byahe ha gawas han Pilipinas. Pero iya ginklaro nga ini nga mga PUM in waray ginpapakita nga sintomas han sakit tobtob yana.
Kadungan hini, iginpatapod han DOH nga andam an ira ahensya han bisan ano nga sitwasyon kasumpay hini nga krisis ha panlawas. Nagpahayag pa an buhatan nga nakagtudlok na hira hin mga level II ngan Level III hospitals ha Region 8 nga amo an magseserbe kun may mga pasyente nga positibo han virus. Ini nga mga hospital amo in mayda mga isolation rooms nga para gud la han sugad hini nga mga kaso.
Gin-utro gihapon ni Roca an panawagan ha publiko nga deri mag-panic ngan igmentenar an kamalipmyo ha lawas. Nag suhestyon gihapon hiya nga kun mahihimo, deri la anay magdumara hin dagko nga mga katitirok kun diin usa ini han posible nga magin hinungdan han pakatapon han sakit. #
