Isumat.com/8:40AM, April 22, 2020
Waray gud pinipili nga bibiktimahon it magraot nga elemento ha sosyedad….kay bisan ngani an usa nga doktor nga aada ha atubangaan han peligro han COVID-19 ginkawatan han suspetsado, pero maupay nala nga nadakop ini nga nangawat.
Subay han record han Abucay Police Station, an biktima in ginkilala ngahi Aida Villanohos, single, ngan doktor nga nagtatrabaho ha Eastern Visayas Regional Medical Center ug residente han Kristina Heights Subdivision, Brgy 71, Naganaga, Tacloban City.
An suspetsado amo naman hi Mark Homeres, 20 anyos, waray asawa, construction worker ngan nag-uukoy ha parehas nga barangay.
Hi Dr. Villanohos in umuli kagab-i pasado alas 7 tikang han iya trabaho ha hospital. Humaw-as hiya han iya sarakyan ngan gindara an iya iba nga gamit ngadto han bungsaran han iya balay ngan iya gin disinfect, pero an iya bag in ginbilin ha kotse. An suspetsado in nag-iininaw la ngay-an ha iya. Samtang waray pa babalik ha sarakyan hi doktora, ginsalisi hiya han suspetsado ngan ginkuha an pitaka ha sulod han bag.
Pagbalik han biktima ha iya sarakyan, nadiskubre niya nga nawawara na an iya wallet nga may sulod nga sobra 11 mil pesos. Nakahunahuna hiya nga dida gudla han sarakyan natabo ini kay segurado hiya nga paglakat niya ha hospital nakada pa an iya pitaka.
Kadagmitan pumakadto hi doktora ha barangay hall ngan ginpa-review an CCTV. Dida gud man na-aktuhan an ginbuhat nga krimen ni Homeres. Deretso pumakadto ha balay han suspetsado an mga barangay tanod ug gin-imbestigar an suspect. Waray nahimo hi Homeres ug iya gin-angkon an iya ginbuhat ug nahibalik ha tag-iya an kumpleto nga kantidad ug an wallet.
Gin-aresto han kapulisan hi Homeres ngan iginpaslak ha karsel ug nakatalaan nga atubangon an kaso nga igsasalawad kontra ha iya. #
