Isumat.com/Mayo 3, 2021
Binawi-an hin kinabuhi hi Rommel John Mendoza, an nangungulo han Maritime Industry Authority (MARINA) ha Eastern Visayas kakulop, Mayo 2, 2021. Hiya in 55 anyos.
Sumala han impormasyon nga nahikay han Isumat.com, namatay hi Mendoza ha kwarto han iya gin-uukyan nga apartment ha Brgy 110, Utap, Tacloban City. An iya bodyguard an nakadiskubre han patay nga lawas han iya agaron.
Gintalinguha nga madara ha hospital an opisyal pero gindeklarar nga dead on arrival han mga doktor. An mga kapulisan in nagpahayag nga waray nira nakit-an nga foul play dida hini nga insidente.
Hin Mendoza in mayda na gin-aantos nga sakit ngan mayda niya gintitinumar nga mga medisina kasumpay han iya karamtan ha lawas.
Antis nagin opisyal ha MARINA hi Mendoza, hiya in nagretiro komo usa nga kapitan ha Philippine Navy. Hiya in miembro han Philippine Military Academy Maalab Class of 1993. Nagserbe hiya ha Philippine Navy ngan nadestino ha Taguig, Cebu, Zamboanga ngan Davao.
Nagserbe gihapon hiya ha South Sudan ha Africa komo kaapi han UN Peacekeeping Forces.
Antis hiya natudlok komo MARINA-Region 8 Director, nagin direktor gihapon hiya han nasabi nga ahensya ha Bicol Region.
Iginpapa-abot han mga opisyales ngan personales han MARINA ha bug-os nga nasud an ira pagduyog ha kabido-an han pamilya han nawara nga regional director. #
