Magsususpender an Department of Education han mga klase ha elementarya ngan high school kun magka may-ada na hin positibo nga kaso han COVID-19 ha Rehiyon Otso.
Dida han iya pakighimangraw han mga kaapi han media kakulop nga adlaw, nagsering hi DepED Regional Director Ramir Uytico nga iya igmamando an class suspension kun may-ada na bisan usa la nga COVID-19 positive case.
Pero iya ginklaro nga kun matabo man ini, deri ini makakasakop han bug-os nga Sinirangan Visayas kay an pag-implementar han class suspension in didto la han duha nga DepED Divisions nga harani o sapit han lugar kun diin nag-ukoy o nagtikang an tawo nga positibo han makamaratay nga virus.
Hapagkayana, an departmento in naghihimo han ngatanan nga mga pitad basi masurapo an paglarab han sakit ngan maseguro an katalwasan han mga estudyante, magturutdo ngan mga personales han ira buhatan, pahayag pa ni Uytico.
Damo na nga mga aktibidadis han DepED an ginkanselar labi na kun damo nga mga estudyante o magturutdo an mapartisipar. Upod na denhi an EVRAA 2020 nga ginpapinid la anay samtang naatubang pa yana an bug-os nga nasud hini nga krisis ha panlawas. #
