Isumat.com/Pebrero 10, 2022
Dako nga kapi-angan para han mga rebelde nga kumunista an karekupo han mga tropa han gobyerno hin 34 nga mga High-Powered Firearms ha Pinabacdao, Samar sumala kan 8th Infantry Division Commander MajGen Edgardo de Leon.
Ini an iya pahayag katapos la nga madiskubre ngan makuha han mga kansundaluhan an mga armas de fuego nga iginsulod hin usa nga dako nga drum didto hin gintotoohan nga kuta han mga terorista nga NPA ha kabubkiran han Pinabacdao kakulop, Pebrero 9, 2022.
Dida han report han Philippine Army 8th ID, an mga narekupo amo an masunod: 24 nga Armalite rifles, 2 nga M4 Carbine Assault rifles, 7 nga China-made AK-47 rifles, ngan usa nga M14 rifle.
Nagtotoo an militar nga ginbayaan nala han nangingiskapo nga mga rebelde an mga armas tungod kay nagtitikaharani na an mga sundalo ngan deri akos han mga rebelde nga dad-on ini kay kulang hira hin tawo.
Kasumpay hini, hi Col Lenart Lelina, Commander han 801st Infantry Brigade nga nakakasakop han lugar, in tim-os an pagpasalamat ha mga tipster nga naghatag han impormasyon mahitungod han gios han mga kumunista nga rebelde.
Sering pa ni Lelina, an katawhan in hul-os na yana an pagtapod ha militar sanglit deri hira nagruruhaduha pagpa-angbit hin impormasyon, ngan dida hini nakakaghimo han kaangayan nga aksyon an mga otoridad.
Hi De Leon in nagpasamwak nga ini an gidadamu-i nga armas nga narekupo han militar dida han kampanya kontra insurhensiya han administrasyon ni Presidente Duterte. Gindayaw ni De Leon an mga sibilyan ug an 801st Infantry Brigade han malinangpuson nga ira operasyon.
Ini nga natabo in makakadiskarel han mga plano han mga rebelde nga maghimo hin bayolente nga mga pitad kontra han publiko ngan militar, dugang pa han heneral.#
