Isumat.com/7:34AM, December 16, 2020
Malulukupan hin kabido-an an pagtigaman han Pasko han pamilya han daragita nga nagpakamatay kakulop, Disyembre 15, ha Tolosa, Leyte.
Subay han inisyal nga imbestigasyon han kapulisan, an 17-anyos nga hi “Jenny” in natad-an nga nabitay an lawas ha balay han iya dada ha Brgy Quilao, pasado alas 11 han aga. An taklap an gingamit han biktima paghigot han iya liog ngadto han kisame han kwarto.
An nanay ni Jenny in nag-asoy ha mga imbestigador nga may mga takna nga nabubusa-an nira an biktima tungod han waray hangkag nga pag ginamit han cellphone. An gadget in gingagamit han kag-anak ha mga transaksyon tungod kay nagbabaligya hira hin garden soil.
Usahay, deri na naa-tenderan an mga tawag ha telepono ha mga kustumer kay gingiginamit man la ha personal nga panuyo han daragita. Tungod hini nabubusaan han nanay hi Jenny. Labot la hini, sugad-sugad nga tumuyo an daragita ha iya kag-anak han waray hiya tuguti nga makaspayada an iya oyab ngadto ha ira balay.
Dida han aga han Disyembre 15, tikang han ira balay ha Brgy Burak, hi Jenny in pumakadto ha panimalay han iya dada ha Brgy Quilao. Han tika-urudto na, ginpinamiling na an daragita ngan nagdesider an iya nanay nga pumakadto ha Quilao ngan didto na nadiskubre an nabitay nga lawas han iya anak.
Gintalinguha pa nga dad-an ha hospital an biktima pero gindeklarar nga Dead on Arrival han doktor. #
