Isumat.com/Hulyo 3, 2023
Igindig-on ni Stephen Dan Palami nga deri lakip ha iya mga plano ha kinabuhi an utro nga pag-entra ha pulitika…..hapagkayana.
Ini an iya iginsumat durante han inagurasyon ngan pormal nga pag-abri han Philippine Football Federation Regional Training Center ha Brgy 103, Palanog, Tacloban City hadin Hunyo 30, 2023.
Nag-esplikar hi Palami nga hapagkayana, sagipo hiya han iya mga obligasyon ha negosyo, Team manager han Azkals National Football Team ngan pangulo hin usa nga Non-Government Organization nga nagdudumara han rehabilitasyon han People’s Center ngan Sto Nino Shrine ha Tacloban City.
Ha pakighimangraw ha mga taga media, nagsering hiya nga iginpapadaplin niya an pamulitilka, pero deri niya hul-os nga ginsasadhan an posibilidad nga kumandidato otro ha tiarabot nga mga panahon.
Sering pa niya, mayda la gihapon hiya oportunidad pagkandidato utro, pero kun san-o ini ngan kun para hin ano nga posisyon, deri pa niya mababaton yana nga mga panahon.
Iya gihapon ginklaro nga an pagdonar han iya pamilya han tuna nga gintukuran han Regional Football Training Center ngan pagdumara han iya NGO ha pag-ayad han people’s Center ngan Sto Nino Shrine in waray kalabutan ha pulitika.
Iya la iginpakita an pagsuporta han oyag nga football ngan pagpa-uswag hini nga sport ha Eastern Visayas. sugad man karuyag gihapon niya nga mahibalik an kama-anyag ngan pamustura han Sto Nino Shrine ngan people’s Center nga kaparte han kasaysayan han Tacloban.
Hadton 2007, hi Palami in kumandidato ka-alkalde han Tacloban City pero naperde. #
