Isumat.com/9:PM, June 16, 2020
264 na katawo an kumpirmado nga natapnan han COVID-19 ha Eastern Visayas. Ini in dara kay may bag-o nga 59 nga nahidugang dida han listahan yana nga adlaw.
Dida han report han DOH Regional Office yana nga gab-i, an Regional Testing Center in nagpagawas han resulta hin 270 nga samples ngan 59 an bag-o nga natapnan. An Divine Word Laboratory in nag proseso hin 94 samples pero tanan negatibo an resulta.
An Baybay City in may bag-o nga 9 nga kaso; Palo, Leyte 2 nga kaso; Alangalang, Leyte 1 nga kaso; Calubian, Leyte nadugangan hin duha nga positibo; 1 liwat nga pasyente an nahidugang ha Bato, Leyte; ngan usa liwat an bag-o nga natapnan ha Tolosa, Leyte.
Mayda naman mga bungto nga syahan nga higayon nga nagka-ada hin Positive Cases, ug ini amo an masunod: Matalom, Leyte – 8; Hindang, Leyte – 6; Kananga, Leyte – 1; Dulag, Leyte – 1; Babatngon, Leyte – 1; Barugo, Leyte – 2; Julita, Leyte – 1; ug an Kawayan, Biliran – 2.
An Calbayog City in may bag-o nga usa nga pasyente samtang 4 naman an nahidugang ha Tarangnan, Samar.
An Tacloban City an nagsakmomo han gidadamu-i nga natapnan yana nga adlaw kay 16 nga residente han syudad an bag-o nga nagpositibo han virus.
Dida hini nga 59 katawo, 18 ha ira in Health Workers ha EVRMC ngan 4 an medical personnel ha Leyte Provincial Hospital. Mahitungod hini, temporaryo nga ginpasarado an operasyon han Emergency Department han EVRMC (Magsaysay ngan Cabalawan).
Ha bug-os nga Eastern Visayas, 36 na katawo an naka-recover tikang han ginkakahadlukan nga kagaw. #
