Isumat.com/Hunyo 3, 2021
Deri nagpapakita hin mala-um laum nga kabutangan an pagsurapo kontra han Covid-19 an Eastern Visayas.
Ini in dara kay nakasulod na ha rehiyon an mas matapon nga “UK Variant” han kagaw ngan napupuno na an kapasidad han Eastern Visayas Regional Medical Center (EVRMC) para han pag-akomodar han mga pasyente nga natapnan.
Mahugot nga nag-warning an DOH Regional Office ha publiko nga pakusgon pa an mga pitad ngan deri gud tumukal ha pagsunod han mga health protocols katapos la madiskubre nga upat na katawo ha Rehiyon Otso an nagpositibo han mas matapon nga B.1.1.7 Variant han kagaw.
An duha ha ira in mga Locally Stranded Individuals nga naka-uli ha Catubig, Northern Samar. Ginklaro han DOH nga an duha in naka-recover na ngan nakakumpleto han katorse ka adlaw nga kwarentina.
An ginkakabarak-an yana amo an duha pa nga iba nga taga Calbayog City nga posible makonsiderar nga local transmission tungod kay waray travel history.
Kadungan hini, iginpasamwak naman han EVRMC nga haros puno na an Covid Ward han hospital kay na-ukuparan na an 38 nga katre nga igin-andam para han mga pasyente han Covid.
Ha interview han iFM-RMN Tacloban, hi EVRMC Information Officer Atty Rodolfo Penalosa an nagsering nga tungod han pagtikahitaas han ihap han mga nagkakatatapnan, nalutaw nga ha kada 100 nga nagpopositibo, an tulo hini in kinahanglan madara gud ha hospital para han kaangayan nga pagtambal.
Tungod han nagtitikadamo nga mga kaso, damo liwat an nasusulod ha EVRMC, sanglit okupado na an igin-reserba nga katre para han mga pasyente, sumala kan Penalosa.
Pero iginpatapod han opisyal nga andam an EVRMC nga magdugang hin bed capacity ngan yana nagpapadayon pag-recruit an hospital hin mga nurses. Aminado hi Penalosa nga kulang an mga nurses yana tungod han nagtitikadamo nga pasyente.
An makukuha nga mga nurses in aada ha Job Order Status hin pira ka bulan ngan puede ma-renew an contrata depende han panginahanglan han ira serbisyo.
Kasumpay hini, hi Penalosa in nanginyupo ha publiko nga deri magpasibaya ngan magin ikmat pirmi kay kun deri kabalabgan an paghataas han kaso, mapupugos na liwat an mga LGU nga magpasunod hin lockdown ug ini in makakapi-ang han ekonomiya ngan pagpakabuhi han katawhan.
Hapagkayana, mayda 1,395 an aktibo nga kaso han Covid ha Eastern Visayas. Yana nga adlaw (Hunyo 3)nahipatik an 276 nga bag-o nga kaso, kun diin amo ini an gidadamu-i nga nahirecord han kada adlaw nga report han DOH han 2021. #
