Isumat.com/6:37AM, November 5, 2020
Usa nga huwes ha korte ngan pira nga mga magturutdo ha sekondarya an lakip dida han bag-o nga mga nagkatatapnan han Covid-19 ha Eastern Visayas.
Durante han meeting han Ormoc City Inter-Agency Task Force kakulop han aga (Nobyembre 4), hi Mayor Richard Gomez in nagpaki-ana ha City Health Officer kun nahi-upod ba han nagpositibo an “reklamador nga judge.” Nagsering an Healty Official nga apil han natapnan an huwes.
Kataliwan nga pagbansagan ni Gomez nga “reklamador” an huwes, nagsering pa hiya nga “Stupid judge” kay deri nagsusunod han patakaran ngan na-reklamo pa. Waray liwat igbuyagyag dida han meeting an ngaran han huwes. Labot la han huwes, mayda bag-o nga walo nga nagpositibo han virus nga personales han Ormoc District Hospital.
Tungod hini, utro ginpa-ilarum ha lockdown an hospital. Ini an ikaduha ka beses nga na-lockdown an ODH. Hadton Oktubre, ginpasadhan an operasyon han hospital han matapnan an usa nga nurse nga nakapanapon ha iba. Han yana nga bag-o nga panhitabo, gintotoohan nga usa na liwat nga nurse an nagdara han kagaw ngadto han hospital.
Dara hini, nagpabati hin kapungot hi Gomez tungod han kamanduan han National IATF nga deri pag-istriktohan an gi-os o biyahe han mga APOR o Authorized Person Outside Residence. Ini in ginlalakipan han medical personnel, Court personnel, PNP, AFP ngan iba pa. Nagsering hi Gomez nga dapat istrikto ha ngatanan kay an mga APOR in natatapnan ngan nagpapakatapon gihapon.
Andam hi Gomez nga umatubang hiya hin kaso kun sasampaan hiya han National IATF, pero iya ginpapa-urog an kahimtang han mga Ormocanon. Nagdugang pa an alkalde nga kun deri magbabag-o han ira mga patakaran an ODH, hiya liwat an magsasalawad hin kaso kontra han hospital. An ODH in ha ilarum han pagdumara han Provincial Government of Leyte ngan waray kontrol ha operasyon han hospital an Ormoc City Government.
Samtang, mayda naman mga magturutdo hin sekondarya nga eskwelahan ha Salcedo, Eastern Samar an nagpositibo han Covid-19. Hira in nagkaada hin sintomas nga kanan “influenza” sanglit ginpa-swab test hira ngan nagpositibo ha virus an resulta.
Hinungdan hini, an LGU-Salcedo in magpapagawas hin kamanduan nga magpapa-ilarum ha lockdown an bungto basi makagdumara hin contact tracing. Sobra napulo na katawo an natapnan didto han nasabi nga bungto.
Ha luyo nga bahin, umabot na ha 66 nga Covid Patients ha Sinirangan Bisayas an tumalikod ha kadayunan. An duha nga bag-o nga nagkamamatay in mga senior citizen nga pasyente tikang ha Calbayog City ngan Las Navas, Northern Samar.
Nahipatik naman kakulop an 416 nga naka-recover tikang han kagaw, sanglit aada na ha 6,379 (90%) dida han 7,046 Total Cases han rehiyon an nakatalwas tikang han impeksyon. An Active Cases hapagkayana in 601.
Na-obserbaran gihapon ha record han DOH-Regional Office an hinayhinay nga pagkanap han virus ha Eastern Samar. Haros usa ka bulan hanhadi nga waray natapnan didto han probinsya, pero han nag-agi nga duha ka semana, nadudugangan an nagpopositibo, ug kakulop mayda 32 nga bag-o nga pasyente an lalawigan.
Nagpapabilin gihapon an paglobo han numero ha Northern Samar kun diin 80 an bag-o nga pasyente han probinsya, subay pa gihapon han report han DOH kakulop, Nobyembre 4, 2020. #
