Isumat.com/5:32AM, May 17, 2020
Waray la gihapon huhugpoy an pagsarang han corona virus ha Tarangnan, Samar. Usa pa nga Tarangnanon an nahidugang dida han listahan han mga tawo nga natapnan han virus.
Iginreport han DOH-Region kagab-i nga mayda usa nga residente han nasabi nga bungto nga nag positibo han kagaw. Hiya in 48 anyos nga babaye nga amo an ika-26 nga Positive Case ha Eastern Visayas.
An swab sample niya in lakip dida han 90 nga ginpailarum ha confirmatory test han Eastern Visayas Covid-19 Laboratory. An 89 nga samples in negatibo kun diin 82 in tikang ha Tarangnan ngan pito an tikang ha iba nga lugar.
Samtang, hira Patient#8 ngan Patient # 12 in duha na ka beses nga nag negatibo an mga samples, sanglit puede na hira pagawson ha Tarangnan Community Hospital pero magkakaada pa hira hin katorse ka adlaw nga kwarentina ha Municipal Isolation Unit.
Hapagkayana, mayda pa 449 swab samples tikang ha Tarangnan an igpapailarum ha confirmatory test ha EVRTC ug magawas an mga resulta hini ha masunod nga mga adlaw.
An DOH in nagdeklarar nga natatabo an commmunity transmission han virus dida han bungto ngan 21 na nga residente hini nga lugar an natapnan han kagaw.
Nagpapabilin an Enhanced Community Quarantine ngan naka total lockdown in lima nga barangay didto han munisipalidad. # (KEVIN SIOSANA)
