Isumat.com/2:15PM, June 12, 2020
Basi matagan han kaangayan ngan insakto nga pagtimangno, nagdesisyon an Local Government Unit han Bontoc, Southern Leyte nga ig-admit ha Eastern Visayas Regional Medical Center (EVRMC-Magsaysay, Tacloban) an nagpositibo han corona virus ha ira bungto.
Sumala han LGU-Bontoc, pakakarawat la nira han notisya temprano pa kagab-i tungod han pagpositibo hini nga tawo, naghimangraw dayon an Municipal Inter-Agency Task Force han kaangayan nga mga pitad ug nagdesider an grupo han pagbalhin han pasyente ngadto ha EVRMC. Ginklaro han LGU nga aada ha maupay nga panlawas an pasyente ngan waray bisan usa nga sintomas han virus.
Naghimo dayon hin contact tracing an Task Force basi matudlok kun hira hin-o an iginkahibalag han pasyente tikang umabot ha Bontoc hadton Mayo 31. Gintagan hin doon han LGU nga waray magsudoy-sudoy an pasyente ngan deretso ini ha Municipal Isolation Facility tikang han iya pag-abot.
Nanawagan gihapon an LGU ha mga bungtuhanon nga deri mabaraka ngan deri tomood ngan magpasarang hin waray kamatooran nga mga impormasyon.
An COVID Positive ha Bontoc in 23 anyos nga lalaki nga nagtatrabaho ha usa nga luxury ship. Hiya an syahan nga nagpositibo han virus ha lalawigan han Southern Leyte. # (KEVIN SIOSANA)
