Isumat.com/1:32PM, June 5, 2020
Mayda na liwat usa nga munisipalidad ha Leyte nga nahidugang dida han lista han mga bungto nga may tawo nga nag positibo han COVID-19.
Dida han gibabag-uhi nga report han DOH-Regional Office iginpagawas alas 1:20 yana nga kulop, usa nga lalaki nga taga Leyte, Leyte an natapnan han virus. Hiya in 42 anyos nga driver hin pampasahero nga van. Waray pa detalye kun diin hiya katapni han virus ngan gindudumara pa yana an contact tracing. Ini nga lalaki an ika-48 nga tawo ha Eastern Visayas nga nag positibo han corona virus.
Iginreport gihapon han DOH nga naka-recover na han virus hira EV Patient 32,33,34,35 ngan 37 kay duha na ka beses nga nag negatibo an ira swab samples. Ini nga lima nga pasyente in ngatanan taga Tarangnan, Samar.
An EVRTC in nagpagawas han resulta hin 183 samples ngan ini nga taga Leyte, Leyte amo la an nag positibo. An Divine Word Hospitral in nagpagawas gihapon hin 91 nga resulta ug tanan negatibo.
Iginpahayag pa han DOH nga nakagtudlok hira hin 18 katawo nga iginka-urupod han nag positibo nga taga Naval, Biliran. Ngatanan hira ginkuhaan hin swab samples ngan naghuhulat pa han resulta. Hira ngatanan in deri nagpapakita hin sintomas han kagaw ngan aadto ha mga Isolation Centers. # (KEVIN SIOSANA)
