Isumat.com/7:30AM, October 10, 2020
Tulo nga mga facilidad ha magkalainlain nga lugar ha Eastern Visayas an iginpa-ilarum hin Lockdown tungod han Covid-19.
Nagdesisyon an LGU ngan nagdudumara han Sub-Provincial Jail ha Laoang, Northern Samar nga ig-lockdown an karsel han magpositibo han virus in pito nga preso. Ini nga bilanggu-an in namumutang ha Brgy Dona Luisa han nasabi nga bungto.
Ginpayungan gihapon hin lockdown an Maasin City Police Office ha Southern Leyte. Unom nga kapulisan an natapnan han kagaw sanglit igin-implementar an nasabi nga pitad. Igin-lockdown gihapon an Purok Tambis ngan Purok Talisay ha Brgy Combado. Tigda la nga sumirit an mga Covid Positive ha Maasin tungod han Local Transmission.
Hinungdan hini, suspendido an pagkarawat han LGU han mga magkaka-uli nga LSI tobtob Uktubre 30 kay napuno hin mga Probable Cases an mga Quarantine Facilities han syudad.
Temporaryo gihapon nga ginpasadhan an Bureau of Internal Revenue ha Ormoc City. Usa nga empleyado han buhatan an nagpositibo han Covid. Tungod hini, an sobra 60 nga personales han BIR-Ormoc an ginpa Home Quarantine. Ngatanan nga tawo nga pumakadto hini nga opisina tikang Uktubre 5 tobtob Oktubre 8 an ginpapa Home Quarantine gihapon ngan ginpapa-obserbar an kahimtang han ira panlawas.
Umabot na ha 5,258 an kaso han Covid ha Eastern Visayas kun diin 4,533 (86%) an naka-recover. Aada naman ha 51 an Covid Patients nga namatay. #
