Isumat.com/4:00AM, August 13, 2020
An mag-amyaw nga syudad han Tacloban ngan bungto han Basey an na-iigo yana han Local Transmission han Covid-19 subay na gihapon han gibabag-uhi nga report han DOH Regional Office kakulop (Agosto 12) kun diin 58 an bag-o nga mga kaso ha Eastern Visayas.
Dida hini nga 58, an tikang ha Basey in 20 nga pasyente, samtang 6 naman an Taclobanon.
An LGU-Basey in nagpahayag nga ini nga 20 katawo in tanan taga Brgy Villa Aurora. Kun aton manunumduman, duha na ka semana an nakalabay, mayda magtala-amay dida han barangay an syahan nga nagpositibo. Hira ngaduha in waray travel history ngan deri liwat hira Locally Strahded Individuals ug waray pa katudlok kun pau-nan-o hira natapnan.
Kataliwan hadto, nagpositibo gihapon an 19 katawo nga ira mga close contacts. Hapagkayana, porlomenos 40 na nga residente han barangay an na-alakbatan han kagaw. Padayon naman nga iginpapatuman an lockdown dida hini nga barangay.
Dida naman han nag-agi nga duha ka adlaw (Agosto 11-12), unom nga Local Transmission an natabo ha Tacloban. An duha ha ira in mga close contacts hin naha-una nga nagpositibo, samtang an upat in deri pa nasasabtan kun hin-o an nakatapon ngan diin katapni. Hapagkayana, umabot na 82 an natapnan ha Tacloban kun diin 64 na an nakatalwas ngan 18 an Active Cases.
An iba nga mga bag-o nga nagpositibo kakulop in mga Locally Stranded Individuals ngan nagkabalik nga OFWs.
Albuera-2, Palompon-1, Ormoc-4, Dulag-2, Jaro-1, Matalom-2, Mayorga-2, Merida-1, Tabontabon-2, Alangalang-1, Barugo-3, Palo-2, Javier-1, Tolosa-1 (Leyte); Villareal-1, Calbayog-1, Sta Margarita-3 (Samar); Gamay, Northern Samar-1; ngan Biliran, Biliran-1.
Umabot na ha 1,421 an nagpositibo samtang 927 an nakarecover tikang han Covid-19 ha Sinirangan Bisayas tobtob yana. Upat an kumpirmado nga namatay ngan mayda bag-o nga duha nga binawi-an hin kinabuhi nga gin-iimbestigar pa yana han DOH. #
