Isumat.com/8:43AM, May 9, 2020
Deri na igpapadara ngadto ha Cebu para han confirmatory test han corona virus an mga swab samples tikang denhi ha Eastern Visayas.
Ini in dara kay nakatalaan abrihan ano man nga adlaw sunod nga semana an Molecular Laboratory nga amo an magpo-proseso han samples ha pagkumpimar kun in usa nga tawo natapnan han makamaratay nga virus. Kagab-i, nakarawat han DOH-Region 8 an sertipikasyon han Research Institute for Tropical Medicine (RITM) nagtutudlok han EVRMC-Tacloban nga puede na magdumara han COVID-19 Realtime PCR.
Kasumpay hini, ha maabot nga pira aka adlaw, deri na maghihinulat an DOH-Region 8 han resulta han mga samples kay bisan ano nga oras puede na pagdumaraon ha EVRMC an confirmatory test ngan deretso igpapagawas an resulta.
Han nag-agi nga sobra usa ka bulan, sugad sugad nga pirmi nabibitay ha pagkabaraka an katawhan ngan alagid-agid hin teleserye an natatabo kay pira anay ka adlaw nga waray klaro kun ano gud an mga resulta han samples nga iginpadara ha Cebu. Dara hini, deri liwat nakakagi-os han insakto nga pangandaman an mga opisyales tungod kay nadepender man hira han magigin resulta han testing.
Nakumpleto na ngatanan an higamit ngan ekipahes dida han laboratoryo ngan paghag-id han mga personales nga maghihimo han sample testing.
Haros usa ka bulan nga nanlimbasog an magkalainlain nga sektor ha aton dapit basi la matuman ini nga hingyap nga magkaada hin kalugaringon nga Molecular Laboratory. An Tingog Party List kaupod han mga personales han Philippine Association of Medical Technologists, Inc (Leyte-Biliran Chapter) an nagmugna han proyekto ngan mga detalye hini.
Nakighimangraw hira kan DOH Regional Director Minerva Molon, Tacloban City Government, EVRMC ngan magkalainlain nga hospital denhi ha Tacloban ug nagka-urusa nga magburublig basi matukod na an testing center. Damo nga mga proseso an gin-agi-an ngan yana pira nala ka adlaw aabrihan na ini.
Hira Leyte 1st District Rep. Martin Romualdez ngan Tingog Rep. Yedda Romualdez in waray pag-alang paggamit han ira personal nga pondo pagpalit han RT-PCR Machine nagkakantidad hin 2.7 milyones pesos. Gingastusan gihapon han Tingog an renovation ngan retrofitting han laboratoryo.
Kadam-an liwat nga ahensya an naghatag hin ayuda para hini nga proyekto ug ini amo an: Office of Civil Defense, Philippine Air Force, Philippine Coast Guard ngan iba pa.
Dara han panginahanglan nga deri mag-iha an pagtukod hini, bumulig na gihapon an An Waray Party List nga naghatag hin air-con units ug an Probinsya han Leyte nga nagpasa hin resolusyon nag-eendorsar han paghimo han testing center.
Ini nga laboratoryo ha EVRMC in dako hin duro an mabubulig ha pagtudlok han mga tawo nga apektado han virus ug amo ini an maghahatag hin giya ha mga otoridad han kaangayan nga pitad nga bubuhaton ha pagsurapo hini nga krisis ha panlawas. # (KEVIN SIOSANA)
