Ginseguro han DOH-Eastern Visayas nga deri denhi ha Tacloban City nakakuha han corona virus an tawo nga taga South Cotabato nga nag positibo han makamaratay nga kagaw.
Subay han iginpagawas nga pahayag han ahensya kanina han ala 1:30 PM, Abril 10, 2020, posible lugod nga ha iba nga lugar natapnan ini nga tawo samtang tibalik na hiya ngadto ha Mindanao.
Ini nga anunsyo han DOH-Region 8 in paghatag hin kasayuran kasumpay han mga notisya nga an ikatulo nga COVID-19 positive person ha South Cotabato in nagbiyahe ha Cebu ngan Tacloban ngan umuli ha iya probinsya.
Dida han impormasyon ngan pagsusi han DOH, kumpirmado nga an 59-anyos nga lalaki in pumakanhi ha Tacloban. An iya travel history in nagpapakita nga sumakay hiya hin eroplano tikang ha Koronadal City tikadto ha Davao, ngan tikang ha Davao ngadto ha Cebu City. Tikang ha Cebu, sumakay na liwat tikanhi ha Tacloban ngan umabot denhi hadton Marso 1.
Temporaryo nga nag-ukoy ha Tacloban ini nga tawo hin usa ka semana, kay pagka Marso 7, bumalik na hiya ha Cebu ngan didto sumakay na liwat tikadto ha Davao ngan umuli liwat ha South Cotabato.
Iginsumat pa han DOH nga an Regional Surveillance Team in nagdumara hin contact tracing han mga tawo nga iya iginka-istorya ngan iginka-urusa denhi ha Tacloban ngan waray bisan usa ha ira in nagpakita hin mga sintomas han COVID-19.
Nagpahayag pa an DOH nga waray tsansa nga nagka-upod an ikaduha nga nag positibo denhi ha Rehiyon Otso han COVID-19, kay an pasyente in umabot ha Eastern Visayas dida han Marso 8, samtang ini nga taga South Cotabato in lumakat na tikadto ha Cebu han Marso 7.
Tungod hini nga mga circumstancia, nagdig-on an DOH nga waray makakuha han virus ini nga lalaki denhi ha Tacloban, ngan waray liwat natapnan nga taga Tacloban hini nga taga South Cotabato ngan posible natapnan hiya ha iba nga lugar nga iya gin-agi-an samtang tipa-uli na hiya ngadto han iya probinsya ha Mindanao.
An Cotabato Provincial Health Office in nag report nga hadton Marso 9 nagpakita na hin mga sintomas han virus an pasyente. Igin-confine hiya ha hospital samtang ginhuhulat an confirmatory test han iya sample. Humagos hin sobra duha ka semana hiya ha hospital tobtob nga waray na niya mga sintomas sanglit ginpagawas hiya ha hospital hadton Marso 26. Pero iginpa-ilarum hiya hin kwarentina didto han iya balay ngan dida la han Abril 8 umabot an laboratory test nga positibo hiya. #
(Posted 2:27 PM, April 10, 2020)
