May adik ha droga, may adik ha sigarilyo, may adik ha irimnon, ngan may adik ha bulang…salit man bisan kun igindederi ngan naatubang hin peligro ha panlawas, waray gud maka-ilob nagpatupada in pira nga mga residente ha Anibong District, Tacloban.
Subay han report han Abucay Police Station, pasado alas 10 han aga kakulop, Marso 23, nakakarawat hira hin impormasyon nga may patupada o illegal cockfighting nga natatabo ha usa nga parte han Brgy 67, Mountainside, Anibong.
Kadagmitan nga pinmakadto an kapulisan basi rondahon an nasabi nga aktibidad. Han maka-abat an nagbubublang nga may mga otoridad tigda hira nga nagpat-arag ngan nangiskapo. Pero hi Michael Labutap, taga Brgy 68, amo an nasikop han mga otoridad. Nagmamalahimo an suspetsado nga kuhaon an iya manok sanglit naabtan hiya han kapulisan.
Narekupo durante han operasyon in duha nga manok nga mga patay na, tigaman nga maiha na an bublang. Nakuha gihapon in duha nga kamanukan nga tinadi-an na. An suspetsado in gindara ha lock-up facility ha Abucay PNP para han kaangayan nga disposisyon.
Hinsabutan gihapon han isumat.com nga dida han nag-agi nga Domingo, Marso 22, mayda mga nagkadadakop nga nagpatupada ngan naghuego hin baraha tikang hin upat nga bungto ha Leyte ngan gin-inquest an mga suspetsado ha piskaliya.
Labot la nga iligal ini nga pagpatupada, usa ini han igindederi yana nga mga buruhaton ha paglikay nga deri magkatitirok an katawhan kay dako an posibilidad nga magi tapon-tapon han COVID-19 virus. #
