Isumat.com/Hulyo 21, 2022
Kun matuman ini, dako an mahibubulig hini ha paglangbo han panginabuhi han mga Ormocanon.
Ha notisya han Ormoc News and Updates, ginlalatag yana an plano nga magtukod hin Ormoc Community College ha deri maiha nga panahon kun diin libre ha kabaraydan an mga estudyante.
Hi Mayor Lucy Torres-Gomez an nagpahayag nga an hin-o man nga kwalipikado nga Ormocanon in makakatagamtam hin full scholarship.
Igindugang pa han alkalde nga deri mag-o-opreser hin damo nga kurso an eskwelahan, pero ira seseguraduhon nga an mga kurso nga pag-aadman in makakaghatag hin trabaho kun makatapos an estudyante.
Sering pa ni Gomez nga iya hingyap nga an mga makakagradwar in deri mababaraka hin pamiling hin trabaho ha hagrayo nga lugar, kay mismo an oportunidad han pakabuhi in didto mismo ha Ormoc.
Hi Gomez in aada ha syahan nga termino komo alkalde han syudad nga ginkatinan anay hadto han iya bana nga hi Richard Gomez nga amo an lumiwan ha iya komo tinaglawas ha kongreso han ika-upat nga distrito han Leyte. #
