Magdudumara na hin checkpoint an mga otiridad ha Eastern Samar komo pitad han Provincial Government kontra han COVID-19.
Dida han Executive Order nga ginpirmahan ni Gov. Ben Evardone, magbubutang hin mga checkpoints ha mga entry points han lalawigan. Adto ini ha mga bungto han Arteche, Taft ngan Lawaan. An Arteche amo an boundary han Eastern ngan Northern Samar; ha Taft naman an pagsulod han mga sarakyan nga tikang ha Samar; samtang an Lawaan naman an entry point han mga sarakyan nga tikang ha Samar ngan Leyte.
Dida hini nga mga checkpoints, ngatanan nga byahedor in magsusurat ha usa nga dukumento han ira ngaran, address, contact number, destinasyon, tikang diin nga lugar ngan kun mayda gin-aabat nga mga sintomas han COVID-19. Kasumpay hini, nag warning hi Evardone nga deri magbuwa dida han ighahatag nga mga impormasyon an mga pasahero kay papatukan hira han kaangayan nga sirot.
Samtang, an probinsya han Northern Samar in nagpagawas na gihapon hin kamanduan nga waray na klase an ngatanan nga levels han eskwelahan ha bug-os nga lalawigan.
Ha probinsya naman han Samar, an Department of Education in nagmando na gihapon hin class suspension ha ngatanan nga districts tinikangan Marso 16. Pero kun waray pa makaghimo han finals examination, kinahanglan himoon na an eksamin ha Marso 16-17, ngan kataliwan hito igsuspender na an ira mga klase.#
