Isumat.com/Hunyo 17, 2022
Mahugot nga igindiwara ni Jericho Fajardo alyas Chocoy nga mayda niya kalabutan han brutal nga pagpatay han mag-oyab ha Calbayog City hadton Hunyo 14, 2022.
Dida han interview han iFM-RMN Tacloban yana nga aga (Hunyo 17, 2022), iginsumat ni Calbayog City Chief of Police LtCOL Ericson Del Rosario nga dida han ira inisyal nga panmaki-ana kan Fajardo, igindig-on han nasabi nga personalidad nga waray niya sala dida han nasabi nga krimen.
Hi Fajardo an ginsikmit han mga otoridad tungod hin Warrant of Arrest kontra ha iya para hin kaso nga Robbery nga natabo hadto pa.
Sumala kan Del Rosario, may mga sirkumstansya nga nagtutudlok nga posible nadadabi hi Chocoy han double-murder, pero ginklaro han opisyal nga deri suspetsado hi Chocoy hapagkayana, ngan ginkokonsiderar la ini hiya nga person-of-interest.
Dida han iya pag-asoy, nagsering hi Chocoy nga waray niya lakat-lakat kay didto la hiya pirmi nag-iinukoy ha ira balay ha Brgy Bante, Tinambacan District, Calbayog City.
Igindugang naman ni Del Rosario nga porlomenos upat ka tawo an nagbuhat han krimen subay han ira masusi nga pagtirutimbang han mga testimonya han mga testigos ngan mga ebidensya.
Hinsabutan gihapon nga may natad-an nga semelya hin lalaki ha ikinatawo han babaye nga biktima, nga magtutudlok nga may natabo nga panlugos, subay han autopsy report.
An mag consuelo nga hira Jade Bestudio ngan high school teacher Jeallen Lamparas in katapusan nga nakit-an nga mag-angkas hin motorsiklo hadton gab-i han Hunyo 13.
Paghagos hin pira ka oras, natad-an an ira mga patay nga lawas ha magkalain nga lugar. Hi Bestudio in didto ha Brgy San Policarpo, samtang an lawas ni Lamparas in nadiskubre ha Brgy Bagacay kun diin 8 kilometros an distansya han nasabi nga mga lugar.
Hi Bestudio in namatay tungod hin igo hin bala ha ulo, samtang pagmalmal ha ulo an rason han kaawat han kinabuhi ni Lamparas, subay pa gihapon han medical examination.
Ginseguro naman han Calbayog PNP nga bubuhaton nira an ngatanan basi masolbar ini nga kaso ngan katagan hin hustisya an mga biktima. #
