Nawara na an pagkabaraka han mga mulopyo han Homonhon Island ha Guiuan, Eastern Samar kay deri na madadayon an nakatalaan unta nga pagdu-ong ha ira isla han cargo vessel kun diin sakay in tripulante nga mga Tsino.
Subay han impormasyon nga nakuha han isumat.com, iginmando ni DENR Secretary Roy Cimatu ha Mines and Geosciences Bureau (MGB) nga deri tugutan an pag-abot han barko ha Homonhon nga magkakarga hin mga produkto hin pagmina.
Dara hini, tim-os an pagpasalamat han mga Homonhonanon ha mga opisyal han gobyerno labi na kan Cimatu ha pamati han ira makusog nga panawagan nga deri tugutan an nasabi nga aktibidad samtang nagpapabilin an hulga han COVID-19.
Hinsabutan nga an barko in pira nala ka nautical miles an distansya tikang ha Homonhon, pero han makakarawat an kapitan hini han mando han DENR in nagpahirayo na ini han isla ngan deri na madu-ong.
Ugsa pa hini, syahan nga nagpabati han makusog nga pagtipa han pagdu-ong an mga residente han isla ha panguna han ira Parokya.
Ini nga panawagan an ginsuportaran gihapon nira Gobernador Ben Evardone ngan Guiuan Mayor Annaliz Gonzales-Kwan nga naghimo hin mga panlimbasog basi kapudngan an plano nga pag-abot han barko.
An cargo vessel in naka-schedule pag-abot ha Homonhon tikang han Abril 3 tobtob Abril 5, pero nakasabot hini an Parokya ha Homonhon ug an mga residente sanglit kadagmitan nagpagawas hira han ira pagtipa hini nga aktibidad. Pira anay ka adlaw nga naka-abat hin duro nga kahadlok an katawhan didto samtang ginpapamulat an aksyon han gobyerno.
An isla han Homonhon in nasasakop han Guiuan ngan may walo nga mga barangay nga namumutang dida han nasabi nga isla. An Techiron Mining Company in nagmimina dida han mao nga lugar ug an produkto han operasyon amo unta an kukuhaon han Chinese-manned cargo ship. #
(Posted 5:02 PM, April 7, 2020)
