Isumat.com/7:55PM, May 6, 2020
Iginka-urusa ni Patient#14 ha usa nga meeting an pira nga mga Hepe hin hospital ngan mga alkalde ha probinsya han Samar, sanglit kukuhaan gihapon hira hin swab samples para han confirmatory test han COVID-19.
Iginpahayag han Department of Health Regional Office nga nasabtan dida han contact tracing kan Patient#14 nga umatender ini nga babaye hin meeting kaupod an nasabi nga mga opisyal han lalawigan.
Ini nga pasyente in taga-Catbalogan pero nagtatrabaho ha Tarangan Community Hospital kun diin pira na ka personales an natapnan han virus.
Dida han gindumara nga contact tracing, nakagtudlok an health authorities hin porlomenos 100 ka tawo nga iginkahibalag hini nga pasyente samtang waray pa masasabti nga positibo hiya han kagaw. Dida hini nga mga tawo, lakip na ini nga mga opisyales han mga hospital ngan pira nga mayor.
Kasumpay hini, ginsagdunan na han DOH ini nga mga tawo nga magpailarum hin istrikto nga home isolation ngan kun magpakita hin sintomas an virus, kinahanglan igreport dayon ini ha DOH.
An Brgy Mercedes ha Catbalogan kun diin residente ini nga babaye an iginbutang na ha Total Lockdown tulo na ka adlaw an nakalabay. # (KEVIN SIOSANA)
