Isumat.com/1:22PM, September 01, 2020
Nanawagan hi Philippine Statistics Authority (PSA) Regional Director Wilma Perante ha publiko nga ighatag an hul-os nga kooperasyon ha mga personales han ahensya nga magdudumara han Census of Population and Housing.
An census in gintikangan Setyembre 1 ngan mahagos ini tobtob Uktubre kun diin pagtitirokon han mga personales han PSA an impormasyon nga mahihikay mahitungod han kadamo han tawo, an ira mga panginahanglan, pakabuhi ngan mga importante nga impormasyon.
Sobra 5000 nga personales an ginkuha han PSA basi maghimo hini nga aktibidad. Magsusudoy-sudoy ha mga kabablayan an nasabi nga mga indibiduwal basi maghimo han survey. Puede ini pinaagi hin personal nga pakighampang han mga tawo, puede gihapon igbilin ngan babalikan nala an mga questionaire, ug puede gihapon pinaagi han pagtawag ha telepono.
Naghangyo hi Perante ha publiko nga tagan hin panahon pagbaton ha mga paki-ana ngan ighatag an sakto nga mga impormasyon. Nagsering hiya nga mayda patok o multa an hin-o man nga mabaribad pagbaton o deri makooperar dida han survey.
Iginpatapod naman ni Perante nga magsusunod han insakto nga Health Protocols an mga tauhan han PSA basi kalikyan nga matapnan han Covid-19.
An katapusan nga paghimo han census in natabo hadton 2015 kun diin gumawas nga sobra na hin 100 Milyones an kadamo han tawo ha Pilipinas. #
