Isumat.com/7:19AM, November 17, 2020
Basi waray madarahigan nga kinabuhi ngan masalbar an mga higamit, nagdesisyon hi Mayor Joseph Caingcoy nga deri na gamiton ha pag-opisina an Municipal Building han Maripipi, Biliran.
An nasabi nga bungto in ginbay-og hin magkasunod nga linog han nag-agi nga pira ka adlaw ngan subay han panginano han Municipal Engineer, an estraktura han munispyo in delikado na ha katawhan sugad man ha propyedad. Dara hini, iya iginrekomendar ngadto kan Caingcoy nga abandonaron na an Municipal Building.
Hadton Nobyembre 15, nagkaada hin 5.0 Magnitude Earthquake kun diin an sentro didto ha Pio Corpuz, Masbate. Na-apekratan hini an Maripipi kun diin gin-abat an 4.5 Magnitude. Kakulop, Nobyembre 16, duha nga linog an nahipatik ha katundan nga parte han Maripipi. Ini in 3.6 ngan 2.5 Magnitude Earthquakes.
Dida han inspeksyon nga gindumara han Municipal Engineer ngan Municipal Disaster Office, nadiskubre an mga gutak ngan distroso ha mga parte han munisipyo.
Ginklaro naman ni Caingcoy nga antis pa matabo ini nga mga linog yana nga bulan, maiha na nga panahon nga deri na gud angay gamiton an building kay nadanyos na ini han naha-una pa nga mga linog pira na ka tuig an nakalabay.
Iginpatapod han alkalde nga makakabiling hira hin paagi kun hain temporaryo nga igbubutang an mga opisina han LGU samtang ginhuhulat nga matapos an pagtukod han bag-o nga Municipal Building nga gintikangan an pagtrabaho hadin Marso 2020.
Ini nga paghimo han bag-o nga munsipyo in usa han mga proyekto nga ginpaningkamutan dayon ni Caingcoy ha iya paglingkod ha syahan nga termino komo amay han bungto. #
