Isumat.com/Agosto 15, 2022
Nagpabati hin pagkabaraka an Visayas State University (VSU), Baybay City, Leyte tungod han nahitabo nga anti illegal drugs operation ha lugar nga sakop han unibersidad hadton Agosto 5, 2022.
Sumala han VSU, may posibilidad nga nagkaada hin peligro ha katalwasan han mga tawo didto han lugar tungod kay waray pakigsumpayan an mga otoridad ngadto han pamunu-an han eskwelahan antis himoon an buy-bust operation.
Nagsering an VSU, an iba nga kaapi han operasyon in nagpakasibilyan la ngan may dara nga armas, samtang an security personnel han unibersidad in may mga armas gihapon. Kun waray koordinasyon, bangin magkaada hin deri pagkasarabot ngan posible magdurot hin deri maupay nga panhitabo, pahayag pa han unibersidad.
Ginhihingita han VSU nga kun mayda sugad hini nga mga aktibiidad an mga otoridad ha maabot nga mga panahon, makigsumpayan unta anay han eskwelahan basi kalikyan an deri pagkasarabot ngan maraot nga sitwasyon.
Ha atubangan hini, ginklaro han VSU nga kasugbong hira han gobyerno ha pakigbisog kontra han iligal nga droga ngan bubuhaton nira an ngatanan basi maproteheran an ira mga personales ngan estudyante tikang han karat-an han droga.
Ha bisan ano nga oras, an unibersidad in andam pagsuporta ngan pagkooperar ha iba nga ahensya han gobyerno ha pagtuman han ira mga obligasyon kun ini nga mga aktibidad iin hihimoon ha lugar nga nasasakop han hurisdiksyon han VSU.
Hadton Agosto 5, an mga operatiba han PDEA, PNP Leyte Provincial Office ngan Baybay City PNP in naka-aresto hin suspetsado ha pagbaligya hin illegal drugs ha lugar nga nasasakop han VSU. #
