Isumat.com/Hunyo 8, 2021
Usa nga kagawad hin barangay an nasikmit han mga otoridad dida han gindumara nga Anti-Illegal Drugs Operation ha Brgy Cantandoy, Paolompon, Leyte hadin Hunyo 5, 2021.
Dida han report han Palompon PNP, an suspetsado in ginkilala nga hi Vladislav Malazarte Bregaudit, 27 anyos ngan kagawad han Brgy Rizal, Palompon.
Syahan nga nakuha tikang kan Bregaudit in usa ka sachet hin gintotoohan nga shabu ug an buy-bust money. Dida han ka-aresto ha iya, ginkapkapan hiya han mga otoridad ngan nakumpiskar in kadugangan nga 18 ka sachet hin gin-aalegar nga droga. Aada ha 50 Mil pesos an kantidad han mga droga, sumala han mga imbestigador.
Dida han panmaki-ana ha iya, nagsering an suspetsado nga nakaka-angkat hiya hin droga pinaagi hin pagbayad on-line ug iya nakakarawat an kontrabando pinaagi hin usa nga courier company ha Ormoc City.
Ha luyo nga bahin, nadakop han Tacloban PNP in usa nga High Value Target ha buy-bust nga gindumara han Tacloban Drug Enforcement Unit kakulop, Hunyo 7.
An suspetsado nga waray la anay pagngarani han mga otoridad in nakuhaan hin 100 gramos hin gin-aalegar nga shabu balor hin 800 Mil pesos.
An operasyon in natabo pasado alas 6 han gab-i ha Juan Luna St, Brgy 33, Tacloban. #
