Isumat.com/7:23AM, Marso 1, 2021
Namatay an usa nga gintutudlok nga pusher han makigpusilay kontra han mga otoridad ha buy-bust operation ha Macrohon, Southern Leyte hadin nag-agi nga adlaw.
Ginkilala an suspetsado nga hi Rene Mori, residente han Brgy Ichon, Macrohon.
An mga operatiba han PDEA-Region 8 an nagdumara hin buy-bust operation kontra kan Mori ha Brgy San Joaquin han nasabi nga bungto. Nakapalit an mga otoridad hin pito ka sachet hin gin-aalegar nga droga. Han makasabot an suspetsado nga mga otoridad an iya ka-transaksyon, bumunlot ini hin pusil pero naunahan hiya han mga PDEA Agents pagpabuto ngan naigo hiya ha lawas.
Kadagmitan gindara ha hospital hi Mori pero patay na han umabot ngadto. Nakuha tikang ha crime scene in kadugangan nga tulo ka sachet hin droga ngan kalibre 45.
Ha iba nga panhitabo, nadakop in usa nga Ex-Barangay kagawad ha Kawayan, Biliran tungod han pagbaligya han iligal nga droga.
Ginkilala an suspetsado nga hi Lauro Collanto, 56-anyos, anay kagawad han Brgy Mapuyo, Kawayan. Hiya in nagsurender na hadto tungod han iya paghilambigit ha droga. Pero bumalik ha iya iligal nga aktibidad hunungdan nga gintarget hiya pinaagi hin buy-bust.
Nakumpiskar tikang kan Collanto in tulo ka pakete hin gintotoohan nga shabu nagkakantidad hin 18 Mil pesos.
Kasumpay hini, iginpasabot naman han PNP Region 8 nga dida han katapusan nga upat ka adlaw han Pebrero, nakahimo hira hin 50 nga operasyon kontra han iligal nga droga.
Tikang han Pebrero 25 tobtob Pebrero 28, nakasikop an mga tinubyanan han balaud hin 37 nga mga suspetsado. Dida han nasabi nga mga operasyon, porlomenos 190 ka sachet hin shabu ngan lima ka sachet hin marijuana an narekupo.
Duha naman nga suspetsado an namatay ug ini in didto ha Libagon ngan Macrohon, Southern Leyte. #
