Isumat.com/3:52AM, May 30, 2020
Nagtitikadamo an mga lugar ha Region 8 nga may positibo nga kaso han corona virus. An gibabag-uhi nga nahidugang ha lista amo an bungto han Tolosa. Leyte.
Kagab-i han alas 11 an takna, an DOH-Regional Office in nagpagawas hin kadugangan nga resulta han laboratory tests nga gindumara ha EVRTC.
Hiya in 39 anyos nga lalaki nga OFW. Sakay hiya han eroplano nga umabot ha Tacloban tikang ha Manila hadin Mayo 25, 2020. Hapagkayana, maupay an iya panlawas ngan aadto ha Isolation Unit ha Tolosa.
Kadungan hini, mayda naman pagklaro an DOH kasumpay han mga resulta han swab samples nga ginpagawas alas 8 an takna kagab-i. Ini nga Batch in mayda 160 samples kun diin 3 an positibo han virus. An mga nag positibo an 21 anyos nga lalaki nga taga Jaro ug usa nga 21 anyos nga taga Tarangnan. An ikatulo amo an repeat test ni Patient # 26 nga tikang ha Tarangnan kun diin positibo la gihapon an iya resulta.
Bootsidngon, duha la an bag-o nga positive cases dida hini nga batch nga ginpagawas han alas 8 kagab-i. Sumatotal 39 ka tawo an nag positibo na han virus ha Eastern Visayas.
Kun pagtatarampuhon an ngatanan nga resulta han swab tests nga ginpagawas kakulop, Mayo 29, an mga bag-o nga Positive Cases in tikang ha Hilongos, Jaro ngan Tolosa ngan lima nga tikang ha Tarangnan. # (KEVIN SIOSANA)
