Isumat.com/Mayo 11, 2021
Usa nga Barangay Tanod ngan lima pa nga iba an nagkadadakop ha magkalain nga operasyon kontra han iligal nga droga ha Norte nga dapit han Tacloban City.
Dida han alas 10 han gab-i, Mayo 10, na-aresto han mga operatiba han Tacloban City Police Station 2 Drug Enforcement Unit an suspetsado nga hi Eric Daantos dida han buy-bust. An 35-anyos nga suspetsado in residente ngan tanod ha Brgy 105, Suhi Guadalupe Heights Phase 2.
Napalit tikang kan Daantos in usa ka sachet hin gin-aalegar shabu ngan nakuha pa tikang ha iya in kadugangan nga pito ka sachet. May balor nga 30 Mil pesos ngan may timbang nga 3 gramos an gintotoohan nga mga droga. Labot la han droga, narekupo gihapon tikang han suspetsado in mga bala hin GA Winchester, kalibre 45 ngan ngan kalibre 357.
Samtang, lima ka tawo an na-aresto ngan kantidad 143 Mil pesos nga droga an nakumpiskar han mga otoridad dida han pagronda hin usa nga drug den ha Habitat Vuillage, Sto Nino, Tacloban City hadin Mayo 9
An PDEA-Region 8 in nagkilala han mga suspetsado nga hira Victorino Dela Rosa (Drug Den maintainer), Elena Dela Rosa, Rosalinda Peroso, Adonis Ursabia ngan usa nga menor de edad.
An mga tauhan han PDEA in nakakumpiskar hin 11 ka sachet hin gin-aalegar shabu nagkakantidad hin 143 Mil pesos.
An mga suspetsado han duha nga magkalain nga operasyon in nakapaslak yana ha karsel ngan maatubang han mga kaso nga iginpasaka kontra ha ira. # (with report from Noel Tampil Sianosa MRN/NTS)
