Ha atubangan han mga pasamwak han gobyreno nga kadam-an na nga lugar ha Eastern Visayas in talwas na ha iligal nga droga o “drug-free”, nagsunod-sunod naman an ka-aresto hin mga opisyal hin mga barangay ha mga operasyon kontra illegal drugs.
Hadin nag-agi nga pira ka adlaw, usa nga barangay kapitan ngan duha nga mga kagawad an nakwelyuhan han mga otoridad dara han paghilambigit hin droga. Dida han Pebrero 6, hi Ramilo Gambito, 41 anyos, ngan Brgy Chairman han Bancas, Hinunangan, Southern Leyte in na-aresto ha buy-bust operation kun diin nakumpiskar tikang ha iya in siyam ka sachet hin gin-aalegar nga shabu kantidad hin 12 mil pesos.
Hinsabutan gihapon nga in inga suspetsado in nag surrender na hadto pero bumalik han iya iligal nga buruhaton. Paghagos hin duha ka adlaw, hi brgy kagawad Jerry Rojas han Bilwang, Kawayan, Biliran an nasikmit ha usa liwat nga buy-bust operation ngan 85 mil pesos nga balor hin droga an narekupo tikang ha iya.
Dida naman han Pebrero 9, hi Priam Ibanez nga kagawad han brgy Quilao, Tolosa, Leyte an nadakop han mga otoridad didto mismo ha iya barangay ngan nakuha tikang ha iya in usa ka sachet hin gintatahapan nga shabu ngan tulo ka sachet hin marijuana.
Dara hini nga alagid-agid nga pagpadayon han panmaligya hin iligal nga droga, an Philippine Drug Enforcement Agency-Region 8 in nakatalaan magdumara hin review han mga nahideklarar na nga drug free municipalities basi masabtan an tinood nga sitwasyon. Hi PDEA Director Emerson Rosales in nag-angkon nga nagpadayon an operasyon han mga drug personalities ha mga lugar gindeklarar na hadto nga drug-free.
Nagsering hi Rosales nga magtutukod hira hin Regional Oversight Committee basi mag-review hini nga kahimtang. Lakip hini nga komitiba amo an mga tinaglawas han Philippine National Police, Department of Interior and Local Government, Department of Health ug an mga natutungdan nga mga Local Government Units. An PDEA amo an mangungulo hini nga oversight committee. Ha bug-os nga Rehiyon Otso, tulo nga syudad ngan 64 nga municipalidad an nadeklarar na hadto nga drug-free. #
